電視要曲面，手機當然要弧面，還記得 2 年前 LG 同 Samsung 都出過弧面手機，但最終兩邊都興唔起而淡出。不過 LG 較早前於 CES 2015 發表新一代 G Flex 2，好唔好用就未知，但好多人都俾佢隻紅色吸引著，而小編 今日就有機會率先試玩它，想知同上一代有咩分別就要留意喇！（以下有更多資料。）
細部更好揸 手感更勝 G3
由 G Flex 到 G Flex 2 轉眼就一年多，今次重點除咗紅色，新機印象最深應該係手感，原因係 G Flex 2 改用較細 5.5 吋屏幕，設計亦仿傚 G3 窄身邊框，兩者加起來令體積明顯比上代細小，再加上「香蕉」弧形設計，拿起感覺甚至比 G3 近貼手，單手操作都冇大問題，而且重量亦輕得多。機背方面，設計跟 G3 完全相同（連位置都一樣），背建按起來幾順手，而機背會繼續使用「自動修復」物料，當然「水貨機」小編 冇得試下刮花佢（賠唔起 Orz…），但質感摸落唔算太膠，而且都幾「綴手」，故此拿住睇片都唔會「跣手」。
▲ 屏幕縮細後，G Flex 2 感覺更好揸手，而且單手操作亦更輕鬆。
▲ 機背設計跟 G3 相同，背鍵用落感覺順手。
▲ 依舊弧面設計，同上代 G Flex 一樣向用力壓直後可變回原來弧面。
▲ G Flex 2 這次可以打開底蓋，雖然唔可以換電，但可以插 MicroSD 。
▲ 跟機配件只有 USB 火牛、USB 線及 QualBeat 2 耳機。
▲ 附跟 USB 火牛支持 Quick Charge 2.0，最高支援 9v / 1.67A 輸出。
不再偏色、1080p 弧面睇片正！
「弧面」手機主角當然係屏幕，老實說之前 G Flex 認真麻麻，但來到 G Flex 2 都可以話一雪前耻。雖然屏幕由 6 吋縮至 5.5 吋，但這次用的是 1080p P-OLED 屏幕，驟眼已比上代 6 吋 720p 細緻，但更重要係顏色終於回復正常，不再好似之前偏冷色，而這次感覺亦同 G3 好接近。至於弧面效果，這次 G Flex 2 弧度好像比 G Flex 更明顯（同尺寸細有關？），無論垂直橫置睇都很有立體感，特別擺近一點睇片效果震撼，感覺好像比 5.5 吋大得多。
▲ G Flex 2 (上) 顏色明顯冇之咁大偏差，感覺同 G3 差唔多，綠色藍色夠有深度。
▲ 弧面屏幕優勢是有包圍感，即使打側睇都唔會好似平面機咁。
▲ 弧面屏幕打直睇感覺會好似長咗。
最新規格配搭 Android 5.0
G Flex 2 話晒都叫 2015 年新機，規格當然唔會令大家失望。首先，機內搭載 Qualcomm 最新 Snapdragon 810 處理器，同 801 及 805 分別係 810 屬 8 核心 (4+4) 架構，支持 64bit 運算，基本上佢會係今年旗艦機熱門配置，但 Antutu 初步測試只有約 47,000 分，成績比 Nexus 6 搭載 Snapdragon 805 低少少，實際性能可能要遲下行貨推出再詳測。另外，此機支援 4G LTE 制式（包括香港制式），背蓋可打開插卡擴充，唯一缺點係暫時只有 2GB RAM。軟件方面，G Flex 2 預載了 Android 5.0.1 系統，同 Nexus 6 相比優勢係軟硬件都支援 64bit 運算，雖然介面跟 G3 好似冇咩分別，但透視效果及提示欄等等其實有些微改動，整體操作非常順暢，感覺同 Nexus 6 差唔多。
▲ 搭載 Qualcom Snapdragon 810 處理器及 2GB RAM，於 Antutu 錄得約 47,000 分成績。 (32GB 實際只有 23GB 可用..)
▲ 支持本地 4G LTE 制式，下載錄得 73Mbps 之快。
▲ 預載 Android 5.0.1 版本，配合 Snapdragon 810 就可用盡 64bit 運算。
▲支援香港中文及其他語文。
▲ 介面其實跟 G3 差唔多。
▲ 機內都有 Smart Clean 、多重視窗等功能。
▲ 相機介面跟 G3 相同，可拍攝 1,300 萬像素相片及 4K 短片 ( 5 分鐘時限）。
▲擁有 Laser AF 輔助對焦，對焦反應迅速，但相片放大有少少「油畫」情況。（▲ 小編 特別在香港的甜品店拍了一些糕點…）
▲ 前鏡頭為 210 萬像素，質素純粹夠網上分享…
小編 ：好揸、靚仔、實用 值得一試 ！
之前試玩 G Flex 小編 覺得純粹綽頭，但今日再試 G Flex 2 感覺完全唔同，機身好揸咗、屏幕靚咗，規格還用了今年最新配置，單純部機小編 評價都幾高（紅色加分！）。售價方面，水貨首批都唔會便宜，但目前預訂價為 $6,280，價錢已比 G Flex 賣時合理得多（G Flex 首賣約 $7,680），如果呢刻呢個價錢要揀 Nexus 6 同 G Flex 2，小編 肯定會揀 G Flex 2，當然大家唔急的話可以再等，甚至等行貨推出都未遲。
售價：$6,280 (預訂)
查詢：三禾電氣（2374 0618）
Leave a Comment