如果講到輕便易攜的平板，相信好多 unwire 讀者都會選擇 7 吋 / 8 吋產品，因為夠輕之餘又足夠日常使用，但如果講到視野開揚，點都唔夠 10 吋咁好，但唔少 10 吋平板都幾重，出街用長時間拿係手都幾係嘢！今日三禾就從日本引入 docomo ARROWS Tab F-03G 呢部防水防塵 10 吋平板，唔止用上 2K 芒，而且機身拿上手真係好輕，可以講得上係外出做嘢或者睇戲的近乎完美選擇。
超輕 10 吋平板
傳統大家都會覺得 10 吋平板唔好用，主要都係因為太重，而今次 docomo 的呢部由 Fujitsu 製造的 ARROWS Tab F-03G，重量就只有 433g，甚至比 iPad Air 2 仲要輕少少。另外，Edward 覺得 F-03G 在機身重量分佈上做得都算幾平均，所以拿係手度完全唔覺重，可以講得上係市面少有可以帶得出街用又唔洗「舉啞鈴」咁辛苦。
F-03G 機身好輕，而且重量分佈好平均，所以拿出街用便攜度好高。
隨機附送機座，支援快速充電功能。
邊框太幼橫向左手拿比較累
另外，平板一向都係橫向使用的情況比較多，而 Edward 發現 F-03G 當橫向使用時，左方邊框明顯是比右方邊框幼一半左右，雖說機身唔重，但左邊邊框太幼，長時間拿住平板手臂都幾累；而右邊邊框因為粗幼適中，所以就無呢個問題。（而直向使用時，由於兩邊邊框粗幼度都同橫向使用時的左邊邊框差唔多，所以都係比較累……）所以對於右手為主力手的朋友（通常左手拿機），用起來個時就會比較辛苦了。
橫向使用時，左邊邊框比較幼，所以長時間拿住會出較辛苦。
而右方邊框就比較粗，長時間拿住都無咁累。
機背「軟淋淋」拿上手幾舒服
另外，F-03G 同好多 Android 平板一樣，都係無得換電，所以機背蓋都係無得打開。不過 Edward 幾欣賞係 F-03G 的機背用了白色比較「軟淋淋」的物料製造，有少少似 Samsung GALAXY S5 的機背電池蓋的手感，相比一般平板都係用金屬甚至塑膠相比，手感真係舒服得多。加上有斜格暗格設計，日系的簡約風格十分明顯。
機背採用純白色設計，加上斜格暗花設計，頗有日系簡約風格。
機背手感「軟淋淋」，手感唔錯。
設有指紋解鎖功能
F-03G 除咗機身輕之外，另一特別就係設有指紋辨識功能，而指紋位置就在機身右方的 Home 鍵。它支援最多 12 個指紋，對於一般人來講肯定夠用（應該唔會有人有多過 10 隻手指掛，除非你拿埋腳趾來解鎖……）。
設有指紋解鎖功能，不過與其他 Android 裝置一樣，只能使用橫掃方法辨識。
支援最多記錄 12 隻手指指紋。
至於效果方面，F-03G 的指紋解鎖確實不錯，至少 Edward 試過幾次，它的解鎖速度都好快，而且試過幾次，都可以掃一次指紋就解到鎖，準繩度基本上可以媲美 iPhone。
2K+ 熒幕質素唔錯
F-03G 另一個賣點就係熒幕，佢嘅熒幕尺寸係 10.5 吋，而且具備 2,560 x 1,600 WQXGA 解像度，加上採用有機 EL 發光板，唔止色彩鮮艷得來接近自然，而且清晰度亦十分高，根據品牌方面表示，可以直迫高質印刷品！而 Edward 亦用它瀏覽 unwire.hk 網頁以及 720p YouTube 影片（因為在 APP 內睇唔到更高解像度的影片……），發現字邊好銳利，亦用上了日系裝置獨有的靚字體，而即使欣賞只是 720p HD 解像度的影片，質素亦算唔錯。加上可視角度甚高，從側面睇都唔會反白或者影響顯示顏色，可以看到日系機種確係有一定程式嘅質素保證。
2K+ 解像度的有機 EL 發光板，瀏覽網站字體十分銳利清晰，字體亦俾人好舒服嘅感覺。
用來欣賞影片,顏色都好自然鮮艷。
熒幕可視角度都好高。
另外 F-03G 設有前置喇叭，位於機身正面左、右兩側。
音效上亦支援 Dolby 虛擬環繞立體聲音效。
此外，它亦設有 Blue light cut mode 模式，如果在較暗或者黑夜環境用 F-03G，只要開咗佢就可以截停藍光，減低熒幕顯示對雙眼造成傷害。這一點，亦是十分體貼的功能。
設有 Blue light cut mode，只要開了它，熒幕就不會發出藍光，當在較暗或夜間瀏覽網頁時，就不會太傷害雙眼。
相機易用質素唔錯
至於鏡頭方面，F-03G 內建了 800 萬像素主鏡頭及 130 萬像素前置鏡頭，當然相比手機動輒過千萬像素的鏡頭來講，明顯輸蝕一大截，但以平板來講，其實已是最高配置。不過前置鏡頭像素如果可以再高一啲，用 Skype 或其他軟件來做視像通話，會有更清晰的效果。而且相機介面都算易用，而且以簡約為主，就算新手都應該可以叮個杯麵的時間內完全上手。
設有 800 萬像素鏡頭，在平板來講都算高質素。
相機介面都幾易用，而且採用直覺式設計。
介面亦十分簡約。
設有 Touch Shutter 功能，只要點按對焦點，就會自動對焦並拍照。
至於質素方面，Edward 使用它的主鏡頭在有足夠光的室內影過相，質素都算 OK，清晰度高之餘，顏色都自然。不過放大來睇就會有明顯油畫化情況，不過以平板影相來講，亦是十分普遍的事。唯一就係佢無內建 LED 補光燈，如果在較暗環境下影相，會比較困難。
試相區
支援 4G‧內建 64GB 可插卡
在上網方面，F-03G 亦支援香港的 4G 網絡，Edward 放入 3HK 的 Nano SIM，並以 OFCA 測速軟件在銅鑼灣鬧市室內測試效果，發現下載及上載速度都有 12.28Mbps 及 17.43Mbps，以一部只支援 1800MHz 頻譜的機款來講，算係 OK。此外，F-03G 亦內建了 64GB 儲存空間，而且亦支援 microSD 記憶卡，最高 128GB 容量都支援得到，即係話容量可以最大擴展至 192GB，就算再高用量的用家來講，應該都夠用吧！
支援 microSD 記憶卡，最高支援 128GB 容量。
亦支援香港 4G 網絡，不過只支援 1800MHz 頻譜。
將 3HK 4G 卡放入 F-03G，並使用 OFCA 測速軟件測試，看到下載及上載速度分別有 12.28Mbps 及 17.43Mbps，算是 OK。
設兒童模式‧效能足夠一般使用
另外，F-03G 除了一般 docomo 產品也有的介面外，亦設有十分吸引小朋友眼球的兒童模式，只要在設定的「Set Style」內轉換就可以了。其中一個模式更類似「兒童模式」，不但有限制小朋友進入設定、下載軟件等功能，而且介面更十分漂亮，相信小朋友一定喜歡。此外，對於長輩來講，亦設有一個模式，不但 APP 啟動圖示會更大，字體亦較大，方便視力較弱的用家使用。從介面去睇，F-03G 確實十分體貼。
在設定中進入 Set style，就可以選擇自己喜歡的主題。
設有兒童模式，介面亦應該很討小朋友歡心。
亦有介面，字體特別大，對於視力較弱的用家來講，使用就最合適了。
至於效能方面，F-03G 並未有採用最新的硬件，只是採用去年旗艦 Android 機主流採用的 Qualcomm Snapdragon 801 2.3GHz 四核心處理器及 2GB RAM，從安兔兔評測的結果可見只屬一般，大約與 LG G3、Google Nexus 5 等效能相若。當然，對於一般使用來講，其實一定足夠，但如果大家想追求 Top Spec，就差少少啦（最少都俾個 3GB RAM 俾我啦，唉……）
使用安兔兔評測，可見效能上只屬中上。
Edward：「係超輕但亦超貴..」
老實說，整體表現來講，docomo F-03G 是一部表現中上的平板，而且具備 IP58 防水防塵功能，跟機附送的充電座又支援快速充電功能，加上以一部 10 吋平板又有咁輕的手感，熒幕又如此高質素，外出使用 Edward 覺得真係好唔錯。但唯一門檻就係價錢：$5,980 的售價，但買到的只是去年的旗艦規格，連 3GB RAM 都無，就真係太貴啦！不過而家始終係第一水，希望未來大貨到港時，售價可以跌到去 5 千頭或者 4 千尾，咁就 perfect 池啦！
售價：$5,980
查詢：三禾電氣（2374 0618）
Leave a Comment