LG 剛在 CES 2015 發佈了二代曲面熒幕手機 G Flex 2，大家的重點當然放係個曲面熒幕上面。究竟呢部機有幾正？而家就帶大家去現場睇真啲！
機身無咁彎上手更易揸
根據外國網站測試，G Flex 2 相比第一代 G Flex 比較，機身弧度其實無咁彎，加上熒幕由 6 吋縮細到 5.5 吋，令大家更容易單手掌握及操控手機，就算放入褲袋、褸袋都唔會覺得唔舒服。
G Flex 2 相比上代無咁彎，拿上手的手感更好。
全新設計，就算放入褲袋褸袋都好舒服。
機背殼有自動修復功能 10 秒還原
另外，G Flex 2 的機背殼擁有自動修復功能，就算輕微刮花，它亦可以在 10 秒內自動還原，對於鍚機的用家來講，真係好正。而且雖然採用膠殼，但唔輕易黏上指紋，對於有潔
企係坐係部機上面都唔爛
另外，G Flex 2 採用了 Dura Guard Glass 玻璃，配合彈性好大的機身同埋機背殼，外國記者測試過，就算企係部機或者坐係部機上面都唔會整爛塊熒幕同埋機身，真係好堅。
機身設計與 G3 相若
至於機身設計方面，G Flex 2 其實與 G3 是相同概念，同樣採用機背鍵設計，亦支援 KnockCode 敲打熒幕解鎖功能，基本上單手操控問題唔大。此外，鏡頭方面，G Flex 2 亦支援 OIS+ 光學防手震功能，加上 Laser 鐳射光輔助自動對焦功能，令佢的對焦速度可與 G3 媲美。
機身佈局與 G3 差不多，也是採用機背鍵設計。
機身正面同樣只有熒幕及虛擬鍵，3.5mm 耳機插孔及 micro USB 端子也是在機身底部。
同 G3 好唔同的地方，就係 G Flex 2 的 3,000mAh 電池係內置設計，唔可以換的。
G Flex 2（下）鏡頭都支援鐳射光輔助自動對焦功能，對焦速度同 G3（上）差唔多。
自拍 preview 超方便
至於前置自拍鏡頭方面，G Flex 2 就加入更佳的自拍模式，無論是將手機放於自拍棍還是用手拿著，都可以好似 G3 咁，輕鬆用手勢進行自拍。此外，當大家影完 selfie 放低部機，就會自動進入預覽模式，等大家可以睇番岩岩影的相；當再拿番起部手機，就會重返相機介面，呢個功能，真係岩哂超鍾意自拍的 unwire 女同事哩！
採用 Android 5.0 Lollipop x 64-bit Qualcomm 八核 CPU 超暢順
最後，講講部機的性能啦。G Flex 2 是市場上第一部採用 64-bit 架構的 Qualcomm Snapdragon 810 2.0GHz 八核心處理器的手機，同 G3 一樣有 2GB RAM + 16GB ROM 及 3GB RAM + 32GB ROM 兩個版本，同樣也支援最高 2TB microSD 記憶卡擴充容量。由於硬件及軟件（OS）均是 64-bit 架構，所以可以盡情發揮 Android 5.0 Lollipop 的效能。而在實測中，G Flex 2 的反應真係好暢順，基本上翻頁或者打字都無窒的情況出現，除咗熒幕唔係 2K 之外，其他規格 G Flex 2 都真係旗艦級級數。
黑、紅兩色大家又會點揀？
最後講講顏色啦。今次 LG 推出 G Flex 2，就有 Platinum Silver（銀黑色）及 Flamenco Red（酒紅色）兩種選擇，如果你問 Edward，我就會覺得酒紅色真係超靚，如果真係買都會揀呢隻色。大家又覺得點？去到呢度，我估大家都想知道兩個重點：幾錢？幾時有得賣？幾錢方面，暫時 LG 就仲未公報，不過應該都唔會平得過 G3 初推出時的定價架啦（LG G3 初推出時 2GB RAM + 16GB ROM 售價為 $5,698，3GB RAM + 32GB ROM 售價為 $5,998），即係大有機會破 6？
至於發售日期，LG 只公佈會在今個月底於韓國率先發售，睇來月底應該都會有韓水流入香港，心急的用家不妨屆時留意？不過如果堅持想買行貨，傳聞 LG 香港都會好快係香港推出 G Flex 2，如果唔係急用新機得太緊要，不妨等等，拿埋利是錢先至換新機，好似仲划算播！
相片來源：TheVerge
分享到 :
最新影片
