聖誕前夕手機都出得「八八九九」，正當小編 同大家一樣可以諗下假期去邊玩的時候，突然有舖頭話我知 Nexus 6 已經返貨，這個時候我抱住「阿寶」出動的心情去旺角同 Unwire.hk 讀者試玩這部不再便宜的「親生仔」，想知表現係點抵唔抵玩就要留意喇！（以下有更多資料。）
好大部 頗跣手！
試過咁多部 Nexus 「親生仔」小編 認為佢地係抵玩，但普遍都比較「細芒」。不過，唔知 Google 係咪俾人話得多，今次 Nexus 6 連小編 見到都覺好大部，5.96 吋屏幕邊框唔算好薄，上下還有前置喇叭，感覺似放大版 Moto G 2014， 但拿起重量似 HTC One Max。操作方面，小編 手大都難以單手操作 5.96 吋屏幕，但更嚴重係機身兩邊很「跣手」，試機時都試過險些跌機，想揸得穩似乎都一定要加保護套，但這樣就令體積更笨重，搞到定位成部 Xperia Z Ultra 咁。
▲ 小編 咁大隻手都單手握不住部 Nexus 6，更莫講話操作，但最驚係部機超「跣手」。
▲ 機背話俾大家知係由 Motorola 代工，而且一樣都有個凹位設計，方便手指拖住。
▲ Nexus 6 同 Find 7 比較，體積都大了一節。
▲ 屏幕上下都有前置喇叭設計，睇片時都算夠大聲，但 Bass 就一般。
▲ 成部機只有機頂一個 Nano SIM 卡槽。
▲ 跟機配件只有 USB 火牛及 USB 線，但這個火牛體積比較大，而且輸出數據除了 5V 1.6A，還列出了 9V 1.6A 及 12V 1.2A，估計用快速充電有關。
最強配置 2K 屏幕稍黃
「親生仔」每次推出都會係當代最強規格，這次 Nexus 6 就用了 Qualcomm Snapdragon 805 處理器 及 3GB RAM，配合 Android 5.0 於 Antutu 可輕鬆錄得 50,630 分，成績拍得住之前 Nexus 9。不過問題就來，一個兼容 64bit 的系統為何只配 32bit 處理器呢？此外，Nexus 6 還用了暫時最高級的 2K AMOLED 屏幕，解像度為 2,560 x 1,440，用於 5.96 吋屏幕可保持密度水平，而畫質小編 認為屬中上水平，可視角度比 G3 稍高，但顏色就比較暖色，睇片時黃、紅、綠色會較深，甚至有場景感覺蓋上「黃色薄霧」一樣。
▲ 搭載 Qualcomm Snapdragon 805 及 3GB RAM，於 Antutu 錄得 50,630 分，成績已經頂尖一群。另外，由於不設 MicroSD 擴充，因此機內提供 64GB 儲存空間。
▲Nexus 6 配備 5.96 吋 2K AMOLED 屏幕，可視角度比較高，但顏色就略為偏黃。
▲ 睇片時部分場景偏黃問題會比較明顯。（上方為 Nexus 6；下方為 Find 7）
▲ 雖然此機為日本水貨，但仍可對應香港 4G 網絡制式。
Android 5.0 超爽 相機比預期好
Nexus 6 同之前 Nexus 9 一樣預載 Android 5.0，兩者功能及介面都差不多，用落跟 LG 介面有少少似，但重點感覺超爽超順。至於相機，Nexus 6 配備 1,300 萬像素 OIS 鏡頭及雙 LED 環形閃燈，拍攝介面屬 Google Camera，裡面都有焦點轉換、全景及 HDR 等功能，而最重要係保留返快門鍵，用落明顯較順手。相片方面，歷代「親生仔」相機都唔太得，來到 Nexus 6 終於總算過得去，雜訊明顯減少，但換來是「油畫」較重，起碼都叫睇得下。
▲ 唔太陌生的 Android 5.0 及新原裝介面。 
▲ 電源管理除了顯示電量分佈，還新增省電模式。
▲ Android 5.0 新功能之一 Android Fit。
▲ 機內都有類似手機付費的功能。
▲ 機內使用 Google Camera 拍攝介面。
▲ 夜間拍攝相片都算平滑少雜訊，但代價是放大睇會見到細節出現「油畫」情況。
▲ 前鏡頭為 210 萬像素，相片相對主鏡頭雜訊較高，而且亦冇特別拍攝模式。
小編 ：勁係勁 但唔再抵玩
Nexus 6 性能強勁，而且仲搭載 Android 5.0，軟硬件都係頂級，但作為「親生仔」抵玩形象似乎完全消失了，因為官方售價都要 US$649 (32GB) 約 HK$5,031，而這次借來的日本水貨 64GB 首批售價更高至 HK$6,780，價錢幾乎是去年 Nexus 5 兩倍，更何況要搵相同規格 (Snapdragon 805 + 2K 芒) 市場都有 Galaxy S5 Advance、Note 4、G3 Cat 6 等選擇，價錢仲要平一節，正如小編 所講 Nexus 6 未有配置 Snapdragon 810 或同級 64bit 處理器係唔夠吸引的最大主因。
售價：$6,780
查詢：三禾電氣 (2374 0618 )
分享到 :
最新影片
