Oppo 係小編 今年最 Like 的品牌，因為佢地嘅新機總有驚喜，繼之前鏡頭識自動轉的 N3 後，近日小編 收到它們早前發佈的 R5，佢特徵係僅厚 4.85mm，造工甚至比大牌子機更薄，加上配備 Find 7 級數鏡頭，不知實際用起來會怎樣呢？（以下有更多資料。）
超薄金屬機 樣靚唔太好楂
小編 試過咁多手機最唔 Buy 都應該係「薄機」，因為好多例子都證明佢地除了薄就一無事處，更何況 Oppo R5 仲要標榜全球最薄（發佈當時）呢！。不過今日拿到真機，小編 都不得不佩服 Oppo 造工，因為 R5 真係好薄，單講 4.85mm 實在好難理解，如果說成比 iPod Touch 更薄，相信大家就會明白會有幾震撼。手感方面，雖然 R5 賣點係薄，但意外地它有強烈金屬感，邊框及機背用了混合金屬製成，手感紮實有少「墜手」，同時兼顧散熱角色，但機背欠弧度設計較難掌握，單手操作並非想像中咁易。
▲ R5 僅厚 4.85mm，機身比現時的 iPhone 6 及 iPod Touch 都要薄，而且同屬金屬機身，造工絕對唔睇得小。
▲ 雖然只有 5.2 吋屏幕，但由於機背欠弧度，拿起感覺就好似拿住 5.5 吋屏幕咁，小編 手大都覺得有點難握。
▲ 成部機設計最大缺點係鏡頭凸起，唔用保護套基本上實「花」。
轉用中價配置 睇相微偏色
過往「薄機」廠商會把最強配置都放進裡，最終就變成又熱又快冇電。相反 R5 Oppo 就選用中價新配置，即 Qualcomm 最新 Snapdragon 615 八核處理器，雖然性能遠低於 Snapdragon 801，但好處是耗電及熱量較低，而且支援 64bit 運算架構，適合日後升級 Android 5.0 之用。此外，機內配備了 2GB RAM 及 16GB 儲存空間，用就好夠用，但缺點是不能插卡換電。而為了達到薄的目標，這次首度轉用 5.2 吋 1080p AMOLED 屏幕，好處是超闊可視角度、暗位夠黑，顏色跟 Galaxy S5 很接近，但不知為何一睇相膚色就會轉濃，感覺有少少奇怪。
▲ 搭載 Qualcomm Snapdragon 615 八核處理器及 2GB RAM，於 Antutu 成績約 22,000 分。
▲ 不能拆殼換電已是預料中事，但估唔度機身只備 Micro SIM 卡槽，只連 MicroSD 都無得擴充。
▲ 配備 5.2 吋 1080p AMOLED 屏幕，顏色跟 Galaxy S5 很接近，但睇相時膚色就比較濃，如上圖「女同事」會比較有血色。
▲ AMOLED 屏幕好處是可視角度非常高，而且打側睇光度都唔會大幅下降。
質素未如 Find 7、勝在多模式
之前 Find 7 相機質素極高，來到 R5 相機規格還跟 Find 7 相同（即 Sony Exmor IMX214 及 F2.0 光圈鏡頭），小編 起初都認為質素應該很接近，雖然對焦反應依然很快，但相片拍出來就明顯遜於 Find 7，主要分別係雜訊比較明顯，放大睇感覺會比較粗糙。雖然質素不及 Find 7，但功能上它會預載 N3 一樣預載較新的 PureImage 2.0+ 介面，特色拍攝模式更多元化，除了 Ultra-HD 及慢快門，它還提供 Super Macro、雙重曝光及 After Focus 等新功能，在 Find 7 未升級前 R5 功能上都會較多野玩。
▲今日下午超好天，但相片暗位雜訊比較明顯。
▲ 跟 Find 7 一樣具備 5,000 萬像素 Ultra-HD 模式，但拍出來效果明顯不及 Find 7。
▲ 有 Pure Image 2.0+ 拍攝模式有更多選擇，正如上圖就用了雙重曝光。
延續快充 追加輕量版
小編 成日話鍾意 Find 7 其中一個原因係佢有「VOOC 快速充電」功能，因為 30 分鐘充到 75% 電量實在太「屈機」，但估唔到這次 R5「薄機」都有快充功能，而且為迎合便攜它跟的更是 VOOC Mini 版本，重點是火牛細很多，USB 線跟火牛可以分開，而且還用了英式插頭，帶出街的確冇咁「阻埞」。除此之外，新 Mini 火牛輸出更由 4.5A 提高至 5A，可兼容舊的 Find 7，而且情況跟之前一樣只支持 VOOC 機種，即使接駁其他裝置或使用其他 USB 線，裝置都會照常充電，但輸出會降至 1A 左右。不過，可換線設計小編 反而更擔心會唔見咗條線就真。
▲ R5 會跟 VOOC Mini 火牛，體積較第一代明顯較細，而且 USB 線更可拆開。
▲ 雖然兩者功能上冇分別，但 VOOC Mini 火牛就擁有較高的 5A 輸出。
小編 ：貴在於薄而不是規格
雖然 R5 未有犯之前「薄機」的錯誤，相機及快充功能都令佢唔係單單賣「薄」咁簡單，吸引係幾吸引，但定價 US$499 節合約成 HK$3,867，價錢竟然同 Find 7 睇齊（OppoMart 現價），老實說同價小編 一定揀 Find 7，始終旗艦價買中價規格點都講唔通。
分享到 :
最新影片
