話說有一次，有位人兄就「邀請」我哋去佢辦公室見面，我哋一坐低，佢就一條接一條咁問「你係邊個？」、「你做咩架？」、「你有咩特別？」、「你點賺錢？」。而佢，就 45 度向後傾斜癱坐於自己張大班椅上叫我哋回答，氣氛奇怪。
我諗你就算被召進老細房檢查肺部，都未必會被這樣盤問。不過，其實由第一日做 IT Startup 開始，這些怪問題已經見怪不怪，但云云問題中，最難答的問題始終是以下這一條 —「你創業做乜?」
問得好，我為甚麼要創業呢？ 而且是搞 IT 創業？ 不如就讓我自我介紹一下。
我係邊個？
你好，我係 Around 的其中一位共同創辦人，新仔一名，請多多關照。
Around？即係咩嚟架？
Around 係一個地區性網絡，將你連接到你附近可靠的人和資源。Around 係我哋嘅新名，之前在 beta 階段就叫 Myflat.hk，主打鄰居網絡。
咁我做呢樣嘢有咩特別？
相信大家都一定有用 Facebook，Whatsapp，電郵等網上溝通渠道，但這些科技卻很難幫你連繫到住在你身邊的鄰居、街坊、商舖、服務機構：而就算網上認識了一位自稱鄰居的網友，也不知是否可信。而 Around 的出現，就是幫大家建立一個可信度高的地區性實用網絡，令生活、工作、出入上的大小問題都更易解決。
我點賺錢？
賺錢方法有二：一是等出糧，二是等分紅，不過我兩樣都仲等緊。
我做乜要創業？
我創業，係因為我想做一些幫到人，為社會作出些少貢獻的事。好似如果你覺得冷，我賣一件外套給你，你又溫暖時我又開心，還可以有錢賺，大家雙贏。
你有沒有想過要創業？
自我介紹完之後，現在論到你了。作為 unwire 的讀者，一定對科技有濃厚興趣，如果我問你有沒有想過將科技興趣轉化為事業，甚至創業，你會如何回答呢?
香港人，其實很多人創業，開魚蛋米線檔是創業、開連鎖小食便利店是創業、開 instagram 網店是創業、就連上兩代長輩開雜貨士多都是創業，大家都為生活各出奇謀。
同時，香港人的科技使用率十分高，幾乎所有新電子產品、裝置、科技都會在香港作首輪發售，科技就是我們生活的一部份。
當科技生活和創業精神合而為一，在香港搞 IT Startup 就更加理所當然，而最近兩年，香港的 Startup 生態的確興旺了很多。如果你腦海中也有一刻閃過創業的念頭，不如就開始動手寫下你的想法，再找你信任的朋友一起談談，當然，也非常歡迎找我飲杯咖啡，一起分享見解。以後，我希望可以在這裡跟各位分享更多香港搞 IT Startup 所學到的，合力撐起香港!
