之前 Lenovo 發佈會，小編 已為大家介紹過 Yoga Tablet 2 / Pro，但想唔到剩下未試的 Windows 版本 Yoga Tablet 2 竟然吸引我去「課金」自用，想知佢有咩吸引我有 Macbook Pro Retina 都唔用？咁要留意我的第一身試用感覺。（以下有更多資料。）
小編 雖然係 unwire 記者，但跟普通人一樣都想買部又輕又平的 Notebook，我本身已經有 Macbook Pro Retina 13″ 及 Lenovo Miix 8，前者太大部攜帶不便，後者要額外帶鍵盤，講到底都冇兩全其美方案。或許大家會建議買 Macbook Air 11″、Transformer T100 或 Switch 10 等等機種，但佢地唔係太貴、屏幕唔靚、就係太重，直到試玩 Windows 版 Yoga Tablet 2 我就決定「課金」自用，甚至令我對 Windows 平板稍為改觀，點解？
▲ 要性能、要屏幕畫質有 Macbook Pro Retina 13″，但缺點是仍然感覺太重。
▲ 為 Miix 8 特別買了 Microsoft Wedge 鍵盤，雖然這個組合夠輕，但鍵盤本身唔算便攜，而且冇 TouchPad 操作總是唔太方便。
第一個原因是屏幕，因為 Yoga Tablet 2 使用 1,920 x 1,200 IPS 屏幕，驟眼睇畫質已勝過上述提及機種（1,366 x 768 太低清吧！）。屏幕本身未見偏色或過份濃烈感覺，要來打稿或睇書都算唔錯。睇片方面， Stand 模式除了可舒舒服服睇片，其實它還設前置喇叭，小編 最近睇「HKTV」都係靠晒佢，即使唔駁喇叭音量都很足夠，但就缺乏一點重低音。
▲ 有了 1,920 x 1,200 屏幕在 unwire.hk 主頁中的細字依然非常銳利。
▲ 用 Stand Mode 就可舒舒服服坐係度睇「警界線」。
第二是 Yoga 設計，雖然「變身」好似好無聊，但無可否認佢係我考慮原因之一。首先，部機本身唔輕（成 692g），但重心傾向手柄位置拿起其實唔算好重，同傳統「平板」成部「墜手」感覺很不同。
其次，佢個支架模式好似同 Surface Pro 3 差唔多，但配埋藍牙鍵盤打字兩者就有明顯分別，而關鍵在於支撐重心，Surface Pro 3 關節位於機背，缺點是支撐力較弱，之前天恩都試過係大脾打字容易「反機」；而 Yoga Tablet 2 關節及重心在底部，向後伸延令支撐力較強，小編 試過在不同交通工具上打字都未試過「反機」，可見流動工作比較勝任。
▲ 手柄設計令 Tablet 模式時拎得更舒服，感覺完成不像 700g 的裝置。
▲ 小編 試過係電車、地鐵及巴士上打稿，但未有一次試過「反機」，而且 10 吋係座位打字亦冇咁「掗拃」。
買得來「做野」當然要有 Keyboard，而 Windows 版 Yoga Tablet 2 就會跟藍牙鍵盤，佢特別之處係非常薄，提供標準按鍵及 TouchPad，而且具磁石可固定在機底或像 Smart Cover 蓋住保護屏幕。小編 覺得最吸引係 Tablet 連鍵盤加埋只重 928g，而且兩樣加埋都好薄，即使放進 iPad 適用的側肩袋非常「Fit」，現在採訪已經不需要拿背包了，超輕便！
▲ 這個就是 Yoga Tablet 2 跟的藍牙鍵盤，它設計非常薄，而且具磁石可固定在機底或當 Smart Cover 使用。
▲ 講「好打」佢未必好得過 Microsoft Wedge，但勝在有 Touchpad 要用 Mouse Pointer 點起上黎都有得用。
▲ 小編 僅用一個適合攜帶 iPad 的 CaseLogic 側肩袋就把 Yoga Tablet 2 連鍵盤放進去，裡面還有空間放置雜物。
▲ Tablet 連藍牙鍵盤只重 928g，相比 Macbook Pro Retina 13″ 連保護殼有成 1.84kg 輕近一半。
▲ 暫時不滿是機身及鍵盤充電位置屬相反方向，萬一要同時充電就比較麻煩。
第三個原因係 Yoga Tablet 2 擁有超強續航力，它配備 9,600mAh 容量電池，官方聲稱使用時間可長達 15 小時，而小編 就試過用來打稿，平均每小時先扣 5%，基本上一日好難耗盡電池，而且它使用 MicroUSB 充電，只須有 5V/2A 輸出的外置電池便可充電，完全毋須為火牛再擔心，相反用 OTG 線甚至可用 Yoga Tablet 2 為手機充電添！
▲ 用了大半日仍有 55% 電量，續航力超強，而且只須 USB 充電，連火牛都可以慳返。
▲ 日常使用實在好難耗盡 9,600mAh 電池，所以不妨用 OTG 線令它變成兼職「尿袋」為手機充電。
最後，大家都會質疑這類 「Atom 機」夠唔夠用，老實說小編 起初都有點擔心，因為撇開快慢部機只有 2GB RAM 其實開多幾個 Browser 都唔太夠。不過，用落除了要改亂開分頁的壞習慣，我都幾滿意 Atom Z3745 的性能，因為小編 主要 workload 都係簡單執下相同後製幾分鐘的短片，執相冇乜難度，剪片在 Quick Sync (Intel GPU 優化) 幫助下輸出 720p 都勉強做到 1:1 時間，但 1080p 就需要 1:3 時間左右，工作效率不至於嚴重影響，因為再大 workload 倒不如在 Desktop 處理會更快。
▲ 由於機內只有 2GB RAM，所以用時就不能無窮無盡地開 Browser 分頁。
▲ 安裝了所有 Windows Update 及少量 Software 後，硬件仍有近 11GB 空間，都算夠用。
▲ 唔夠位是這類 Atom 機的死症，但加插 MicroSD 記憶卡都總算可舒緩一下。
▲ 返到 Office 嫌芒細唔夠用？機旁還有 Micro HDMI 可駁返顯示器一同使用。
用了 Yoga Tablet 2 一個星期，小編 對佢評價遠遠超出預期，因為佢完全滿足了我「輕便」、「耐用」要求，外出工作固然方便，就算攜帶回家使用亦不用為火牛煩惱，如果純粹娛樂可以連鍵盤都不同帶添！售價方面，定價為 $3,999 連藍牙鍵盤，價錢好似比同類機種貴少少，但如果對比 ThinkPad 10 或 Switch 10 Black Edition 這類 Full HD 級數機種就相差唔多。不過，講到底好唔好用都係好主觀，但小編 就「課金」自用，甚至將會取代 MacBook Pro Retina 13 成為外出主力機。
