雖然今時今日，好多人打機都會在 console 平台或者手機上面玩，不過在電腦打機，始終都仲有一大班支持者。但香港居住環境唔大，要砌部打得到機的電腦，機箱通常都唔細（仲要未必型！！），買番屋企剩係諗擺位都搞到大家勁頭痛。ASUS 最近推出的 ROG GR8 Gaming PC，唔止機能強勁，仲要機仔細細易擺位，外型又夠曬打機 feel，機迷必入手！（以下有更多資料：）
機仔細細夠哂型
ASUS ROG GR8 採用了迷你電腦設計，機身四四方方同月餅盒差唔多，而且黑色霧面機殼配合紅色圖騰花紋機邊，十分型仔，當作家居擺設都毫不失禮。此外，它亦十分輕，只有 1.28kg 重量，同一部 Ultrabook 手提電腦重量差唔多，就算要轉擺位、甚至由睡房 / 書房拿出廳駁住大電視打機都好容易。
▲機面已有標明是 ASUS Gaming 產品的 Republic of Games 標誌。
▲機邊以圖騰式花紋作裝飾。
效能強勁打機超爽
另外，在硬件方面，GR8 都好強勁，唔止用上 Intel Core i7 處理器，仲用上迷你電腦少有的 NVIDIA GeForce GTX 750Ti 獨立顯示卡，就算玩球類遊戲、動作遊戲等都好順暢，打機一流！當然，除了打機之外，呢個配備用來睇片都好流暢，即使睇 4K 片都夠曬力，要欣賞 UHD 超高清畫質，只要配合相關 LCD 芒或者電視就得。加上內建了 256GB SSD 儲存，比傳統 HDD 無論在開機定係讀取速度都更快，打起機來自然更爽。
值得一提的是，跟機仲附送專為機迷而設的機械式 Gaming Keyboard（按鍵有紅色背光）同埋 ROG GLADIUS gaming 滑鼠，靈敏度高達 6400dpi，按鍵佈局亦同樣是專為機迷而設，打機時就更得心應手啦。
配備高端網絡打機唔驚 lag
作為機迷，尤其是會玩 online game（例如：League of Legend）的讀者，最擔心的通常唔係硬件配置夠唔夠力，而係打機個時會唔會 lag。GR8 就內建了 Intel LAN + Gamefirst III 網絡，提供不會出現網絡遲延的 Gigabit Networking 技術，以後打機就唔驚 lag 了。另外音效上，它亦支援 SupremeFX，而且設有 S/PDIF 光纖音效輸出，只要駁住高階喇叭，就可以享受震撼及極具現場感的打機音效了。
▲迷你電腦都一樣有 S/PDIF 光纖音效輸出。
極冷靜表現、可隨時升級
此外，GR8 亦全部採用了手提電腦的硬件，配合獨特機身設計，令即使電腦全速運作時，發出聲浪亦只是低至 28dB，而待機狀態下發出聲音分貝更低至 23dB！此外，它亦十分省電，在待機的情況下，所耗電力只是低於 15W。
另外，它亦具備隨時升級的特性，只要將機面蓋向旁邊拉，就可以打開硬碟及 RAM 槽，用家可按個人需要升級 2.5 吋 HDD 或 RAM，完全唔洗螺絲批，十分方便。
端子齊全、可無線播放手機內容
最後，相信大家最關心的，就是 GR8 作為咁細的 Gaming 電腦，端子上會唔會「將貨就位」？答案是不會！它除了多達 6 個 USB 插槽（機前 USB 2.0 x 2、機背 USB 3.0 x 4），視頻輸出端子更支援 HDMI 及 DisplayPort 各一。而在迷你 PC 上較少有的，就是它內建 Miracast 接收器，只要將 Android 手機或平板透過 Miracast 功能與 GR8 接駁，就可以無線在 LCD 芒上睇手機或平板內的影片、甚至操控手機，十分好玩呢！
▲GR8 機仔細細，但端子都好齊全，視頻輸出有 HDMI 或 DisplayPort，就連 USB 3.0 端子，機背都有 4 個。
▲機身前方都有 USB 2.0 端子 2 個，而右邊的更可以支援關機為手機充電。
▲ASUS GR8 亦是市場上少有內建支援 Miracast 功能的迷你電腦，只要按下這個位於機身前方的按鍵，就可以無線接收手機無線訊號，並將手機畫面顯示的內容輸出至 LCD 芒上。
▲只要按下這個 Miracast 按鍵，就會進入上圖這個介面，然後在手機的螢幕鏡射（或類似意思的功能）中按顯示 ID 點選接駁就可以了。（如果再按一次就會退出 Miracast 介面並跳回 Windows OS 介面。）
▲然後就可以在 LCD 芒上瀏覽手機熒幕顯示的內容了。
Edward：估唔到打機電腦可以咁細部！
試玩過 ASUS ROG GR8 後，Edward 真係估唔到一部效能咁強勁的 Gaming PC，外型可以咁細同埋咁型仔，確實喜出望外，最適合我這種鐘意打機，但書房又唔係好大的居住環境。睇來 Edward 買咗部 GR8 之後，都要將個 LCD 芒升級到 4K 解像度，先至襯得起佢啦。
售價：$10,999（連 2 年保養服務）
查詢：ASUS（3582 4770）
Leave a Comment