近年大家打機睇片都靠晒手機平板，雖然操作比電腦方便，但缺點是屏幕太細不宜分享，唔通真係要帶部電視出街？之前 Asus 就推出一款 S1 Projector 投影機，體積只有一台 Android Box，方便攜帶之餘，還可為你手機充電！（以下有更多資料。）
鋁面高檔！外表似 Android Box
流動投影機向來印象都很膠、很「玩具」，但小編 見到 S1 Projector 竟然覺得佢幾靚，主要原因是外殼由鋁金屬打造，表面還有拉絲紋，感覺高檔。其次，機身正正方方，機背又有 HDMI 及 USB 介面，驟眼睇似 Android Box 多過似投影機，外形上絕對帶驚喜。
一插即用 手機、遊戲機都用得！
S1 Projector 安裝極之簡單，任何裝置具備 HDMI 或 MHL (手機/平板) 就可接駁到投影機，完成後開機便會自動顯示，亦毋須像一般投影機要 Warm up。當然睇片要有畫有聲，投影機會具備立體聲喇叭，音量足夠，但低音欠奉，如果想再好一點，機身亦設 3.5mm 耳機輸出可駁喇叭。
▲ 設 HDMI / MHL 輸入及 3.5mm 耳機輸出，另外旁邊還有 1 組 USB 輸出用作充電。
▲ 手機 / 平板可透過 MHL 連接到投影機。
▲ 機身左右兩邊都有喇叭，睇片時音量都算足夠。
畫面夠光喎！短距離畫面都好大
規格方面，它採用 LED 光源及 DLP 技術，優點是壽命可長達 3 萬小時，並提供 200 流明度及 100% NTSC 色域標準，投影出來的畫面顏色跟手機接近，而且特設 Ultra Short Throw 技術，只須 1 尺距離就可投射 41 吋影像。此外，它的影像輸出為 854 x 480 解像度，雖然聽落很「低清」，但由於亮度充足，睇落畫面好似 720p 咁，效果比預期理想。
▲ 投影機採用 LED 光源及 DLP 技術，亮度足夠之外，還有 100% NTSC 顏色水平。
▲ 跟平板及 Notebook 一樣都有 SPLENDID 調整畫面選項。
▲ 在稍為有光的環境下，畫面都亮度非常充足，而且在近距離下已經可投射頗大影響。
內置電池一物二用！
上文步驟好像少了接駁電源，但投影機仍會正常運作，原因是 S1 Projector 內建 6,000mAh 電池，可供長達 3 小時用量，要來睇戲都肯定足夠。而為了唔好浪費機內電池，機上特別加入 USB 介面，但大家唔好以為用來駁 USB 手指讀取文件，其實它是用來駁手機充電，輸出為 5V/1A，換言之唔用投影功能都可當外置電池使用。
售價：$2,990
查詢：ASUS (3582 4770)
Leave a Comment