上星期 iPad Mini 2 減價好多人包括小編 都想入手。不過用唔慣 iOS 又唔想考慮貴一節的 Nexus 9，先前 Alcatel 推出一款「Hero 8」平板，重點是唔貴！並設 WUXGA 高清屏幕及輕薄機身，唔知實際用起來會點呢？（以下有更多資料。）
Alcatel 向來推出「抵用」手機及平板，但配置往往都唔會有驚喜。不過，這次 Hero 8 小編 第一個反應是驚訝，因為機身非常薄，比很多手機還薄（僅 7.3mm 厚），而重量就跟 7 吋 Nexus 7 (2013) 差不多，感覺完全唔似「平機」。
▲ 單手可輕鬆拿住，重量跟 Nexus 7 2013 差不多，但這部 Hero 8 屏幕更大。
▲ 右邊 Hero 8 跟左邊 LG G2 明顯更薄。
Hero 8 另一驚喜是配備 1,920 x 1,200 IPS 屏幕，驟眼睇畫面已相當銳利，可視角度頗闊，唯一缺點是顏色比較偏暖色，但情況仍可接受。規格方面，機內搭載 MediaTek MT6592 八核處理器、2GB RAM 及 16GB 儲存空間，雖則唔算貴價配置，但於 Antutu 仍錄得 30400 分，玩 Real Racing 3 都算順暢，性能唔差，只是預載介面用落有點「納」。此外，小編 試玩的 Hero 8 更支持 4G LTE 網絡，機背頂部可插入 Micro SIM 及 Micro SD。
▲ 配備 MediaTek MT6592 八核處理器及 2GB RAM，於 Antutu 錄得 30433 分。
▲ 配備 1,920 x 1,200 8 吋 IPS 屏幕，畫面銳利、可視角度更闊，但色溫就比較暖。
▲ 預載介面操作跟 Google 原裝差唔多，但底部功能鍵就不同。此外，此機還可支持 4G LTE 網絡及語音通話。
▲ 設定內可調整屏幕色溫，但強行調至偏冷感覺會有少少偏青。
雖然介面用落唔太爽，但內建超彈性「Multi-Window」連小編 都覺得「超好用」，原因是幾乎所有 App 包括 Whatsapp、Youtube 甚至 Real Racing 3 都可用浮動視窗展出，一般情況可開左右兩個視窗，但系統本身無設上限（小編 最多開過 8 個視窗），每個視窗可隨意更改大細及位置，當然越開得多視窗就越細，而小編 就成功邊玩 Real Racing 3 邊睇「四點鐘 許Sir」，效果還可接受，如果換成轉珠就更不成問題。
▲ 可以邊玩 Real Racing 3 邊睇「4 點鐘許 Sir」。
▲ 雖然不清楚視窗上限，但小編 試過開 8 個 App 亦不至於癱瘓。
▲ 這個特別介面底部會變成五鍵設計，它們都是兩鍵 Multi-Window 熱鍵，左邊是開啟，右邊是把原有 App 縮成視窗。
Android 平板向來感覺只是「大芒手機」，原因是兩者使用方式完全相同。不過，現在 Hero 8 特設 Multi Window 大屏優勢終於可以用盡，雖然 8 吋唔算好大，但分開兩個視窗已經好好用，起碼邊打機邊睇攻略唔洗再睇手機。至於 Hero 8 本身唔貴，配備 WUXGA 屏幕及 MediaTek 處理器效果都唔差，而且有 LTE 都唔洗 $3,000，如果日後加推更高規格的 10-12 吋版本就更不得了。
售價：$2,999（LTE）
查詢：ALCATEL（3180 2777）
