相信唔少抽唔中獎，排唔到 iReserve、又唔想捱炒價的真 iPhone 用家，呢個時間都準備向馮宅、白盧薈呢Ｄ連鎖店埋手，串哥今晚收工果陣就同某大連鎖店店長老友吹水，佢話呢一刻間間舖已經到哂貨，不過要買到就唔係咁易啦…….. 以下更多資料：
串哥都知呢一刻好多人都想知邊度有 iPhone6 買，所以今晚就同某大連鎖店店長老友傾計，佢話基本上呢一刻間間舖頭都到哂貨，唔理係旺角定北角，銅鑼灣定九龍灣，iPhone 6 同 iPhone 6 Plus 都有得賣，最大既分別只不過係數量多定少。老友仲話好多靚仔 Sales 呢幾日已經 Call 定熟客仔幫佢地留定機，希望遲Ｄ可以係佢地身上搵返多D，所以有時遇到生客行埋去買唔到機就係咁解囉！想係連鎖店成功買到 iPhone6？旺角就唔好諗啦！不妨去下一 d 冇咁旺既分店，買到的機會可能會高d!
以前一路都聽到係連鎖店買機要「食骨（機連配件一齊買）」，今年情況又點呢？老友話佢地賣既機一般會比先達平 $2,000 左右，因為機價唔可以標得太高，可以一般都係送個 Bluetooth 耳機黎賺返差價，唔多唔少都要食少少骨。咁串哥老老實實問老友 iPhone6 幾時先會跌價，老友就話而家呢Ｄ瘋狂炒價根據以往經驗一般都係頂盡維持一個星期左右，真係買黎自用的朋友記住要忍忍手，捱多個零星期，應該就會去返個合理水平啦！
串哥老友臨走仲笑笑口爆多句，有人話馮宅 iPhone 6 Plus 唔夠貨賣喎，原因咪就係之前玩左轉網上首賣囉！不過串哥又覺得，點會有人網上賣哂 D 貨而攪到冇貨賣街呢？想知消息堅定流？大家不妨聽日自己去附近舖頭睇下咪知囉！