Hej！馬年來到，先跟讀者們拜年：祝大家身體健康，事事如意！今個星期筆者並非在寒冷的瑞典度歲，而是飛返香港跟家人度過。難得回港，除了行街 Shopping 四處食，亦入了戲院睇戲，相信有在外國生活過的朋友，都會掛住一班人同聲同氣睇港產片的感覺。
預訂了年三十晚到數碼港睇《金雞sss》的戲飛，一來見到 Cast 陣容鼎盛，二來筆者是《金雞》系列的 Fans，亦因為支持導演兼編劇鄒凱光和負責配樂的兩位朋友 Alan 和 Janet。電影當然沒有令我失望，筆者並非影評人，就無謂作太多技術分析。讓我看得笑中有淚，加上有無數驚喜，就經已值回票價了。
見到王菀之、黃偉文，甚至古天樂、盧覓雪的精彩演出，當然令人眼前一亮。更重要是張家輝的哥頓哥出冊後一段，筆者隱隱帶點感同身受。哥頓哥踎監多年出冊，眼見「地盤」尖沙咀已經失去，香港變天；筆者今年返香港過年，原本熟悉的地方，感覺同樣陌生。
作為香港島「島民」，逛銅鑼灣、時代、Sogo 是筆者由細到大每星期必做的事。買衫睇波鞋買手機換 Notebook 食飯打書釘通通在銅鑼灣搞掂；前幾日走到時代廣場、Sogo，彷彿到了深圳東門、金光華、萬象城。在電器鋪波鞋店，甚至是 UNIQLO 和 Apple Store，由周遭的環境到售貨員的態度和嘴臉，我明白銅鑼灣已經不是筆者過去認識的地方，和哥頓哥出冊後一樣，那裡的人和物已經變了。
《金雞sss》內，哥頓哥最後有神奇女俠阿金一齊拍住上，在尖沙咀東山再起，毋須出走斯洛文尼亞。現實中，筆者失去心中「地盤」銅鑼灣，確實有點黯然神傷。如果現實跟《金雞》一樣，劉德華做特首，情況會否好一點呢？
後記：年三十晚下午 4:15 分在數碼港百老匯 1 號院 L 排 11、12 號位的女士，請你尊重一下其他觀眾，在電影播放中傾偈已經非常缺德，還要在電影感動位時雞啄唔斷傾電話幾分鐘實在好過份！
圖片來源：鄒凱光 Facebook
分享到 :
最新影片
