相信唔少爸爸媽媽都想時時刻刻望住個 bb，不過香港人產假短，又未有法定既正式侍產假，想好似外國咁放一年半載陪住個 bb 基本上冇可能，想係返工既時間忙裡偷閒睇下 bb 就可以用 IP Cam 幫手了。不過市面上的 IP Cam 種類繁多，功能又多到眼花頭痛，究竟點揀實用的 bb 用既 IP Cam 呢？ 小弟近日便花了不少時間和心機去做 IP Cam 資料搜集，今次就和大家分享一下揀 Cam 條件同埋安裝心得！
1.支援手機 Apps
雲端 Cloud Computing 已經係而家必備的 IP Cam 元素，相信大家都唔會坐定定係 Office 用枱頭部公司機安裝軟件黎睇 bb，大家都一定想係手上面既 iPhone、Android 手機、平板睇啦！其實而家唔少中高階型號的 IP Cam 均可以支援 Android / iOS Apps，只要係手機上面裝好 App，就可以經 4G / 3G 或者公司既 WiFi 駁返屋企睇 bb，方便又靈活，所以係今時今日黎講支援手機 Apps 的 IP Cam 絕對係必須品。
除可以睇到屋企情況之外，亦可以在 App 入面切換鏡頭視點及預設指定的 Angle 等，所以 IP Cam 可以支援支援手機 App 絕對非常重要。
2. 360 度旋轉功能
香港地唔少住宅的客廳都係長方形設計，所以除非閣下屋企好大或者準備用 3-4 部 Cam 組成 IP Cam network 全方位監察，否則就一定要揀鏡頭較 Wide 的型號，可視角度越大越好，方可以令最多的空間「入鏡」減少家中的「盲點」。當然，坊間不少 IP Cam 都可以支援水平、垂直旋轉功能，可以隨時調較拍攝家中不同高度、角落，一部 Cam 就可以隨時切換到客廳、飯廳、bb 床或者梳化幾個唔同的視點了。
大部份的 IP Cam 都可以支援垂宜和水平旋轉功能，杜絕家中盲點。
3.支援夜視 / 動態偵測功能
好多父母都會係 bb 細細個既時候就分房瞓訓練佢地獨立，所以好可能會在同一間屋企既 network 用到 IP Cam 黎進行監視。若果大家準備將 Cam 裝係 bb 房，觀察佢會唔會晚夜發惡夢、嚇醒，記得一定要買一款支援 IR 紅外線夜視燈的 Cam 了。市面上不少支援夜視功能的 Cam 可以支援低至 0.01Lux 流明低光度拍攝，咁就唔駛開燈都可以清楚睇到 bb 的一舉一動，最適合住村屋、又或者房間距離較遠的朋友。另外，一些高階 IP Cam 可以支援動態偵溫、溫度偵測功能，而且亦可以透過內置咪和喇叭把畫面和聲音同步傳送到父母的手機、電腦上面，bb 一喊、移動便可以提示父母留意，這樣便可以大大減少發生意外的機會了。
要分辨支援夜視功能的 Cam 相當簡單，只要鏡頭前方見到一堆透明的夜視 LED 燈便可以支援放間拍攝功能了。
利用紅外線燈拍攝出來的畫面會以黑白顯示出來，看起來 畫面仍是相當清晰的呢。。。
4. 掛牆設計更佳
除了留意 IP Cam 規格之外，大家亦要注意它的底座設計，若果閣下家中房間沒有平面可供擺放 Cam，最好便是選擇一些支援掛牆架的款式，可讓用戶把 Cam 掛在牆角使用，咁就唔駛阻礙地方亦可以拍攝更 Wide angle 的畫面了。值得一提，而家大部份型號都已經可以支援 WiFi 功能，即使 Router 唔係附近都可以上到網，所以放係邊度都沒有限制，不過小弟就認為好多時網絡的穩定性麻麻，唔想成日斷線 set 來 set 去的話就不妨使用有線 LAN，尤其是 IP Cam 本身都要火牛供電，其實冇可能做到完全無線監視呢!
話就話雖然可以WiFi 無線上網，不過咪又係要駁住電先用到! 小弟唔想釘線上牆，一氣之下駁埋 LAN 線任由佢「吊吊 fing」算數…………..
後記： 解像度不是最重要
小弟在一開始揀 IP Cam 的時候亦和大部份的朋友一樣，首要條件就是睇解像度夠不夠高。不過其實 1080p 和 720p 的分別，就只在於 200 萬像和 130萬像素鏡頭而已，實際上的效果分別並不如大家所想般巨大，有時甚至係手機上面睇 VGA(640 x480 / 30 萬像素) 解像度畫面亦已經好清楚，所以解像度並不是全部。其實鏡頭 set 係屋企某一個角度只會睇到 bb 大概的舉動 (沒有專人揸 Cam 對正 bb，冇可能做到面對面拍攝啦! )，所以大家亦唔好對畫面有不切實際的要求了。其實更加重要的是 IP Cam 的 fps 流暢度夠不夠高，會唔會窒下窒下、斷線，又或者手機 Apps 功能實唔寅用、配件夠唔夠齊全等，產品的周邊配套有時比單純追求解像度更加重要呢！
