小弟雖然工作和 I.T 有關，而且間中亦要拿起相機拍攝，但係由於自己一直不太喜歡影 Model，所以錯失唔少影靚女的機會，當然亦算不上精於人像攝影了。不過最近家中有喜小女兒順利出世，相比起完全不懂影相的媽媽，小弟自然要充當家中的攝影師了！希望之後可以和大家在 unwire 分享一下和 bb 生活相關的科技應用心得，亦很歡迎大家交換意見和心得呢！今次便先和大家分享一下在醫院和 bb 影全家福的一些得意事!
私院幫你影埋
首次見面和和大家分享一下「歷史性的全家福」吧！相信唔少朋友都知道，醫院入面由於有極多電子儀器設備，大部份病房都不可使用手提電話，更不用說要在手術室、產房拍照了。其實聽朋友講現時不少私家醫院已經將全家福相片作為「生仔 package」的一部份，只要肯比錢佢就會幫你用佢既相機影相仲有埋即影即有連相架添！諗起都覺得係五星級既享受。不過可能唔少朋友都和小弟一樣選擇係公立醫院出世，雖然服務質素未必可以同私家醫院相比，但係公共醫院生產可算是作為一個納稅人其中一項最大的福利，大大話話可以節省 3/5/7 萬蚊當作奶粉錢呢！媽咪連 bb 一齊住左5日加埋都唔駛 $1000 埋單，比起入私家醫院要比 5 / 6 位數字的費用，對於一般打工仔黎講當然慳返好多。
連幫手影相既護士姐姐都讚 b 女好叻，一出細就識得開眼影相，因為十個有九個 b 出世後好大段時間都係合埋眼既，你係叻既 bb!!
一定要用「真。相機」
一早已經聽到身邊唔少朋友講「公立醫院唔會比你影相架！」，不過亦有人建議小弟帶定相機碰碰運氣。在此提醒各位準爸媽記得要帶真正的相機（DC、單反、菲林機都得，就係手機唔得！切記！），因為醫院職員 Default 認定手機電池波會干擾儀器，所以即使你已經設定「飛航模式」都唔會比你用或者幫你影，而且只能影相不能拍片的。要把握機會係 bb 出世時影低珍貴的全家福，記得一定要帶相機啦！不過以上的情況就只限於媽媽係順產 (不用開刀)，因為如要開刀爸爸便不能陪產（避免準媽媽在手術過程受細菌感染），而且媽媽亦可能因為麻醉藥未過而不在清醒狀態，如果不是順產最好還是乖乖回到病房才拍攝好了。另外，值得留意是準爸爸要入產房陪產要事先在醫院的同意書上簽字（基本要求唔可以怕血,亦可以選擇自己剪臍帶），若果準爸爸是突然才決定要陪產，護士及醫生一般都不會批准的。
相信好多人都諗住有部手機係手就可以影相，但是在醫院入面卻會被禁止使用呢！
產房影相靠彩數
小弟早係太太入院之前已經把數碼相機放入隨身袋裡面（記得裝好記憶卡同埋充電！），即使醫院在凌晨來電時亦唔怕臨急臨忙「執漏野」。其實當各位爸爸去到醫院入產房太太亦不是即刻生得，好彩既話你要等半個鐘至幾個鐘不等，唔好彩既亦聽過要推返媽媽去病房等足一日再生都唔奇。而小弟就好好彩等左唔夠一個鐘就見到個 b 出世，而當護士姐姐把清潔完既 bb 交比媽媽時，小弟馬上就硬著頭皮問護士姐姐可唔可以幫我們這一家影全家福啦！可能呢個護士姐姐比較 fresh 特別好人，二話不說想也不想便應承幫手，但係當影完相醫生返黎一見到部相機就即刻喝令小弟收起相機，仲話產房唔比影相添！所以話，其實係產房影唔影到相真係好講彩數，當然想影既話帶備相機一定係最基本的要求，再加上閣下誠懇有禮的態度，講多幾句唔該、多謝，禮多人不怪就看看能不能融化冷酷的護士姐姐了。。。。
係 bb 病房入面一定不能使用手機影相，而小弟以 DC 拍攝要瞓箱唔走得既 bb 比樓上病房既媽媽睇，護士姐姐睇到又冇制止或者勸喻小弟收埋，當然牆上亦沒有「不准拍攝」字句啦，真係好視乎唔同公院捉得緊唔緊。
Auto 模式最穩陣
再講一講相機設定技巧？當然梗係越簡單越好啦，你估個個護士都係影相發燒友咩，幫你影相唔係佢份內事，只要張相出黎夠光、唔手震、冇眨眼就已經收貨啦！所以小弟只有一個建議，就係最好用 P Mode，因為佢鑊氣最少張相衰極有個譜，除非你專業到可以係產房短短時間之內設定好光圈、快門而又對護士既技術信心爆炸，否則產房相片冇 Take 2，最好都係乖乖地用 P Mode 叫護士姐姐幫手影多張仲好！另外，一定要記得千其唔可以使用閃光燈! 除了因為剛剛出世的 bb 眼睛不能適應強光可能受損之外，閃光燈在產房亦可能嚇親其他醫院人員及孕婦，唔想對自己個 b 造成傷害又或者成為女士大哂的產房入面既既眾矢之的，影相切記關掉閃光燈啦！
記得係比部 DC 護士之前設定至 P Mode，雖然影出黎未必一定好，但是肯定比起要細心設定的 M Mode 方便就手。
影相前先溝通
值得一提，係 bb 剛剛出世一刻影全家福可能只係各位爸爸一廂情願的想法，其實媽咪未必一定想係產房影相的。其實大家想想媽咪既要忍受多個小時陣痛以及生產時的十級痛楚，披頭散髮而且又汗流浹背，若果太太屬於貪靚一族的話，果一刻佢唔想影相希望各位爸爸亦可以明白同理解。其實不妨等到媽媽回復狀態，返到病房等 bb 埋身之後再影不遲，而且回到家中要影全家福的機會真係咩時間都影得啦。當然如果一早同太太溝通好，能夠拍低呢個歷史性時一刻對於呢位家庭新成員黎講絕對值得記念啦! 而且亦方便向朋友、親戚經 facebook、whatsapp 宣佈喜事！ 好了! 下一次再和大家分享一下返到屋企影初生 bb 生活照的趣事和心得！
當 bb 檢查完畢身體夠重又夠健康，好快就會由 bb 房推上媽媽病房，到時再慢慢影都唔遲啦!
分享到 :
最新影片
