數碼相機界最近好多新機出，除左 SONY 旗艦 A7 / R，Nikon O 記等等都有新動作，正因為咁最近好多朋友都拎部相機去放，造成一輪「放機潮」。
串哥早兩日落開星際同做專二手相機 Hi-tech 老闆 Ray 哥仔吹過兩句，佢話最近好多人放機呀，我問佢做咩「鞋口鞋面」。佢話：「你有所不知啦，最近個個等新機，放晒佢地 D 老婆落來。而家機就多多，但買機人少。」
我又追問：多人放機唔係代表個市暢旺咩？你應該開心先係架！然後俾佢話返我轉頭，你諗下而家呢個 Timing，又諗下 D 人咩情況先會好想買相機？
真係一言驚醒，而家正正係暑假後、聖誕前，D 人要買機暑假已經買左，又未到聖誕旅行，又的確冇乜誘因走去換機。佢話作為二手店，D 人落來放機佢又冇理由唔收，加上個市無啦啦旺果陣又怕唔夠機，所以近期二手相機真係供過於求。
諗返轉頭，又的確每年呢個時間，見到佢個樣真係仲煩惱過 wiki wong。咁代表一個狀況，如果大家有意買機的話，而家二手相機店個講價空間應該都幾大，係時候試下有冇緣份撞到好機了。
當然我最後都有幫大家問著數，我問佢如果話 unwire 網友有冇特價先？佢話講左先，盡力喎！果然呢排好靜！
Leave a Comment