自 iPhone 5s 推出後，大陸人熱捧既「土豪金」金色版一直有價有市，串哥仲記得兩個星期前問係先達做野既朋友，佢地仲話 16GB「土豪金」回收價仲有 9 千度！不過大陸黃金週假期完左，呢排身邊朋友早前係 Apple Online Store 訂既 iPhone 5s 大貨又陸續到手（佢地好多當然即刻走去放機啦！），搞到先達呢兩日既「土豪金」貨多到水浸！加上街頭既大陸佬直頭停哂收機，深圳華強既回收價都跟大隊插水到人仔 5,700 左右，先達佬自然唔想蝕，所以今日「土豪金」回收價大幅跌到去 $6,500 左右，比 5s 金色原價只賺 1 千蚊不到，認真悲情！
雖然「土豪金」沒落，但好趣怪既係之前一直個個唔想買到（因為水位唔多）既太空灰及銀色，因為呢排個個「炒金」，先達貨量唔算多，所以 16GB 價位仍然企硬係 $6,300 同埋 $6,400 左右。
可能大家會覺得不如到手既「土豪金」keep 番一排先，等遲啲貨源又唔夠個時先拿番出來賣，咪唔洗賺咁少。但串哥係度忠告大家：「投資」價格可升可跌，而且串哥身邊唔少早排入左大量「金」既朋友仲未派到貨，所以未來先達金色機數量只有愈來愈多，加上大陸華強又「關閘」唔收機，「土豪金」回收價隨時仲有得跌！各位「果農」，你想 keep 機我唔會阻止你，但就要有定心理準備隨時再遲啲放賺仲少啦！
Leave a Comment