小弟一向自認係超鐘意睇波，當然我講嘅係足球啦！仲記得讀大學個時，一有啲咩大賽，例如：世界盃、歐洲國家盃，朋友之間嘅話題肯定只有一個：「今晚去邊個屋企睇波先？」無計，當年睇波唯有靠收費電視，又或者要成班 friend 去 K 房睇。但去到今時今日智能裝置盛行嘅日子，有一部平板，再加個 4G 網絡，就邊度都睇到波啦！
免費電視任你睇
最近某間免費電視台就透過三個高清數碼電視台，加上手機 / 平板 Apps 直播喺巴西舉行緊嘅洲際國家盃，一眾熱愛足球嘅球迷，又可以係各歐洲聯賽賽季結束後繼續捱夜，欣賞自己心愛球員同埋國家隊嘅精彩演出。事實上，今次播洲際國家盃，係免費電視台可以睇哂所有場數，甚至下年暑假播巴西世界盃，都可以係免費電視台睇到成 22 場（以往由於俾其他收費電視台 bid 咗，所以係免費電視台最多都係睇到 4 場）。就算唔係電視旁邊，都可以透過 Apps 或者上網睇到直播，雖然唔係睇到哂，但都叫做進步咗好多。加上而家各台嘅 4G 網絡覆蓋又已經算好好，對於「波痴」嘅小編來講，真係好方便！
Apps 無高清真落後
不過進步還進步，係廿一世紀嘅「smart」年代，小編仍然有一樣嘢好不滿嘅，就係點解我開電視，就睇到高清到爆嘅球賽，但係一落到手機、平板，就只係俾「低清」版本俾我？事實係技術上，以今時今日嘅 4G 網絡速度，點解我拿住好「smart」嘅手機同埋平板，就要「硬食」低清質素嘅畫面？當然有人會話：「唓！網絡商而家好多都唔俾真正嘅無限數據服務俾你，俾你睇到高清球賽，咪又係盞你嘅數據用量快啲用完，最後咪又係俾人限速或者限量用，無謂啦！」
嗱嗱嗱，一件事還一件事！網絡商慢慢唔俾無限數據上網服務俾我哋用係一回事，但你唔俾我用 Wi-Fi 係無電視嘅房入面，瞓係床度睇波架？就算要用 4G 網絡係街度睇，我諗都唔係個個人都會場場都係街度睇掛！我覺得有個選擇，我呢一刻唔用都好，但有日我想用個時，起碼有多個選擇。而家要係手機、平板喺街度睇高清足球，搞到我要買某一個指定品牌嘅手機先至可以做到，而我無用個個品牌嘅手機，我就唯有忍受低清足球比賽，我覺得好唔公平囉！
時刻監察用量就得
其實有人話用 4G 流量好快用完，我覺得只要大家時刻睇住自己用左幾多，自然就住來用就可以。最簡單嘅方法，就係可以用 Android 手機入面嘅「數據使用」功能，睇住呢個月用咗幾多用量。當然，如果大家覺得咁睇法唔夠準確，又或者你喺用緊 iPhone、iPad 或者其他 OS 嘅手機，不妨喺 download 軟件嘅商店度搵搵自己網絡商嘅 apps，download 落來，時刻 check 住自己用咗幾多 data，咁就唔洗擔心用 4G 睇波用爆 data 啦！
