搞 Gad：從「當年」的 Xanga 中吸取教訓

提起 Xanga，相信唔少 80 後同 90 後都知道喺乜，還記得小編仲讀緊書個時，總係有種兩性區分：男嘅玩 bbs 討論區，女嘅就玩 blog，而選擇通常都得兩個：唔喺 Yahoo! Blog 就係 Xanga！最近聽到 Xanga 如果係 7 月中籌唔到 6 萬蚊美金就會摺，不禁懷緬起當年玩 Xanga 嘅「秘密」日子。

女仔嘅「秘密」天堂

還記得，當年同個時嘅女性朋友係 ICQ 傾開計，我問佢點解好揀唔揀揀個香港字 support 咁差嘅 Xanga 寫 blog（當年 Xanga 真喺好多香港字都出唔到架！而家係點就唔知囉），佢答咗我兩個好簡單嘅答案：一）可以加密碼 close 埋個 blog，你想睇？你自己都開番個 xanga 囉，之後申請要睇我嘅 xanga blog，我鐘意咪俾你睇囉！二）好多正公仔同埋顏文字可以加入文同 comment 度。

又確實喎！當年嘅 Xanga，多得呢種「密碼」制度，確實喺唔少女仔寫自己男朋友、阿爸阿媽、甚至學校入面嘅老師、同學事非嘅集中地！當年小弟都承認為左想「偷窺」女性朋友鮮為人知嘅一面，所以都申請咗個 xanga。當然，update 就算吧啦，都係間唔時 hea 寫算數，因為「醉翁之意不在酒」啦！

不進則退死路一條？

事實上，科技就喺咁：ICQ、xanga 呢類俾到我地 80 後、90 後好多童年、少年回憶嘅互聯網服務，去到今時今日網速極快，而且手機上網成趨勢嘅年代，已經變成不進則退、甚至步入「棺材」嘅情況。說實在，就算俾你今次 xanga 籌到 6 萬蚊，又點？

點解 WordPress 會愈來愈受歡迎？點解其他 blog 服務都仲有佢地既死硬支持者，xanga、ICQ 呢啲「老太公」服務就一潭死水？你以為順應潮流，出番個 mobile app 就可以解釋一切問題，xanga 會再度衝上來又一次成為備受少女們追捧嘅 blog service？好簡單，睇番 ICQ 就知道！出咗 mobile app 個排，確實好多人都追番「童年回憶」玩咗陣，而家點？大家咪又係走番去 WhatsApp、LINE、Facebook Messenger 呢啲 IM 嘅懷抱。

唔見棺材唔流眼淚！

其實 xanga 嘅問題，係咪真係無人匯報番俾佢地聽？又唔係喎！呢幾年一直喺互聯網見到有人向 xanga 表達香港字支援不足、介面一成不變自行設計元素少（相對其他 blog service 而言）等等問題，但 xanga 就一於依然固我做個「離地 blog 公司」，變都無變。大佬呀！呢個世界無話無咗邊個唔得嘅，你唔變？我等！再唔變？走囉！反正呢個世界 blog service 又唔係得你一個，你只喺我互聯網生活入面嘅一個「過客」嚟架咋！

好啦，之前「唔見棺材唔見眼淚」，而家大勢已去，就諗住「搏同情」，希望大家捐個錢俾佢，等佢可以轉營。好聽啲，可能喺「轉營」求存，唔好聽啲講句：個老闆只喺想繼續拖落去唧！商業社會又唔係開 NGO，無錢賺嘅嘢又點會再有人做有人投資？最慘嘅係，好似 xanga 呢類公司，人地想你做好啲你又「意見照受，態度照舊」，而家「扮可憐」，有邊個仲會有信心捐咗錢俾你之後你會重新振作，俾大家見到一個與別不同兼與時並進嘅新 xanga 先？

WordPress 支援一線生機？

事實上，今次見到 xanga 籌款，老闆話想思考未來前途，睇仲有幾多人支持 xanga，如果籌夠款就會為大家帶來一個由 WordPress 支援嘅全新 xanga。事實上，呢樣都算喺向前踏出咗一步，至少用咗 wordpress，會多好多 plug-in，blog 主們要 customize 自己嘅 blog 會易好多。但喺係呢個競爭咁激烈嘅互聯網世界，究竟 xanga 今次過渡到難關後，會唔會痛定思痛，為大家帶來一個既吸引又好用又可以保留以往「私密性」嘅 blog 服務？呢一點小編有啲保留。

當然，我希望我諗多咗啦，希望今次 xanga 如果過到難關後真係可以俾到我哋呢班 blog 友一啲驚喜！如果唔得，又或者之後要靠 blog 主俾月費先可以用你嘅服務的話，就好難再次逃過時代巨輪嘅衝擊架啦。

來源：Xanga Crowdhoster、Xanga、互聯網圖片

分享到 :

最新影片