【有碗話碗】：「一天一天工作，消失感覺」

以前出街聽歌要買 CD 再放落 DISCMAN 聽，到後期用 MP3 機、iPod 聽，點都好都要事先準備一番，宜家只要系手機 / iPod touch 下載 KKBOX 同 Spotify 依類 App，再撳幾下想聽咩都有，同以前比實在方便好多。

話說本小姐最近開 KKBOX 聽歌，但聽住原有嘅 Playlist (其實都聽到爛啦……)，忽然發現多咗個新功能叫 Quickplay (本小姐唔知系唔系新啦，但對我來講就真系開心大發現啦，hehe) ，佢會隨你選嘅心情、年份、語言、類型然後俾歌你聽。

我揀好晒要咩後，竟然俾我聽到首陳年舊歌：「同學重聚紛紛減少，彼此也禮貌了。歡呼減少，花名也漸忘掉」。哈哈，唔知有幾多人識呢首歌。如果你識，睇黎可以同我做朋友！ (笑)

首歌我以前好鍾意聽，但已經 N 年無再聽過，就連呢隊組合嘅歌，我都少聽左好多……

但係一聽我嘅回憶番晒黎。記得小學時期，班裡面 30 個同學我估有 8 成都係 TWINS 嘅粉絲，那些年本小姐就試過為咗儲 YES 閃卡日日落 YES STATION 打躉同人交換 (估唔到女仔都會咁哩 ^^!)、放學番屋企同同學仔傾電話討論歌曲，甚至癲到會為左鬥啊 SA 同啊嬌紅嘅程度，數足每首歌嘅詞佢地各佔幾多句 (今時今日睇返真系好幼稚，不過果個年紀又有幾多人唔幼稚 WoW)，仲會同對方用錄音機大家一齊唱歌，扮佢地添 (俾比面，唔好作嘔，hehe)！又試過重來都未咁鍾意過睇電視廣告，而每日坐定定等睇 TWINS 嘅廣告出現。最誇張嘅係試過有朋友仔為左爭 CD 嘅簽名籌而大打出手(小朋友唔好學姐姐咁)……

不過呢啲都係兒時嘅有趣事。宜家 YES STATION 已經執哂，而電話就為咗客而 24 小時Stand-by (同朋友 fb Messager / WhatApp 多過傾電話)，更加唔使講有時間會坐低睇電視啦 (經過成日勞心勞力工作，返到屋企都身心俱疲啦，唉)。

種種嘅回憶竟然因 1 首歌喺 10 幾年後一幕幕重現眼前，咁多年前嘅事喺好似系琴日發生咁，你地又不妨搵番屬於你地那些年嘅主題曲，搵番你地嘅青春，同我分享下你地嘅趣事啦！

分享到 :

最新影片