呢兩年，市面不停出現手機錶、偷拍錶等表形 Gadget，但除了其中兩隻係 LG 出品外，其餘多數都來自山寨廠。而呢類 Gadget 表的銷售點，亦多數係先達或腦場的細舖，頂盡賣到去潮舖「追思Shop」，所以始終俾人上唔到大檯的感覺。但近排情形就唔同喇，事關有點知名度的 Gadget 廠 EZIO，一口氣就出了 12 款 Gadget錶，仲傾掂了白蘆薈幫手推銷，在多間大分店中留個皇帝位櫥窗俾佢陳列批錶。見佢一字排開咁晒冷12隻錶，真係幾有氣勢架！
呢 12 隻錶，最平$690有交易，最貴賣到 $2,380。唔同款式仲有唔同功能，最貴那隻係 PDA 電話錶，有得篤芒又有埋鏡頭，較平的款式就分別有拍攝或播MP3功能。但最特別反而係最平幾隻，賣點係識得測出人體酒精含量，飲完酒 check 一check 有冇超標先開車，就唔怕俾差佬截時吹波仔過唔到關喇。呢個功能之前好少在 Gadget 身上出現過，新鮮感點都大過出完又出的手機錶啦！看來只要 Gadget 廠肯諗下計，Gadget 表應該仲可以有好多玩法。