賤價耳筒 假貨賣通街!

爆料時間！近幾個月大家無論行先達、信和、腦場、格仔舖、鴨寮街，甚至女人街同廟街，都總會見到有大堆耳筒賣，但我可以大膽講句，呢批耳筒十對有十對都係假貨！

其實都唔使我教大家點分真假，各位只要問下價錢，一聽到係賣三、四十蚊賤價一對，都應該知道係假貨啦！其中最多係假扮 audio-technica，大佬，人地話晒係耳筒名牌，最平款式的真貨都賣過百蚊，唔好咁傻咁天真信有舖頭會平賣到幾十蚊呀！最誇張仲係款聰明豆 In-ear 耳筒的假貨，真貨平極都差唔多 $100，估下假貨最平賣幾錢？係 $10 呀！若然你唔介意假貨音質差、又唔怕俾人知你用假貨的話，買對粗用都唔錯。

呢隻聰明豆 In-ear 的假貨，最平賣到 $10，平無可平。

但真貨仲賣緊 $100 左右，認明盒面有原裝正貨貼紙。

鴨寮街同廟街的耳筒全部都係假，反而可以俾人認清乜款有假貨。

呢類假耳筒，真係已經俾人劈價劈到爛，冇肉食之餘，仲要提心吊膽驚海關捉，所以有些舖頭已開始唔再賣。但都有些奸商會將假貨賣到同真貨差唔多價錢去搶錢，唔想俾人呃的話，我建議買耳筒前去鴨寮街等地方行下，那裏的耳筒一定係假，記低所有假貨款式，若你想買的款有假貨，買之時就要特別小心，幫襯大舖就最穩陣喇！