創業環境唔單止係劃一塊地皮出嚟，然後起幾棟野就可以創造到。有唔少人分析過美國矽谷（Silicon Valley）之所以咁成功，成為世界資訊科技嘅核心，令大家趨之若騖，最主要原因係矽谷有史丹福大學（Stanford University）。Stanford 係矽谷嘅人才庫，培養出科技、法律、金融等等各種人才。佢地學校除咗有開設熱門科目「高科技創業」，仲有各式各樣計劃俾學生參與，香港暫時都真係仲未追得上。
不過 ，唔好咁灰住！雖然香港未有最好嘅配套，但係小編都睇到唔少機構好積極咁推出同創業相關嘅計劃，以發展香港成為下一個創業之都。就好似最近，數碼港就同史丹福大學商學研究院（Stanford Graduate School of Business）推出左「數碼港 – 大學合作夥伴計劃」，以金融科技（Fintech）為重點，培育有志創業嘅年輕人成為科技同創業人才。
今次參加呢個計劃嘅同學分別係由港大、中大、科大、城大同理大提名，一共有 18 個隊伍 63 位同學入圍。計劃入面嘅培訓課程由史丹福大學商學研究院參與制定，旨在俾同學掌握全球科技行業發展趨勢，同埋獲得世界級嘅創業培訓。
Stanford 都唔係淨係幫手編課程架，最正就係 被選中嘅細路 成功入選嘅同學，仲可以喺史丹福大學商學研究院參與一星期嘅金融科技創業營，聽講數碼港仲全數包晒佢地嘅學費、來回機票連食宿添…（阿源上身羨慕mode）這些機會… 佢地今個星期五就出發喇，除咗去上金融科技及創業課堂，仲有機會親身參訪美國矽谷科技企業，同一眾業界領袖會面同交流添！
就咁睇，小編都好想有機會去觀摩下，唔係話外國嘅月光特別圓，而係人地嘅人力物力超晒班，過去浸一浸，聽下人地講野，感染下個氣氛都好，返到嚟一定有啲野學到。
去完返嚟之後，各隊將會喺數碼港、Stanford同埋本地大學導師嘅指導下，繼續搞好佢地有關 FinTech 嘅產品雛型，然後參加數碼港喺 11 月舉辦嘅「2015 全球創業週中國站– 香港」。到時，贏左嘅隊伍分別都會有 10 萬元現金獎，同埋仲可以直接得到數碼港培育計劃嘅面試機會，成為 incubatee 就可以將佢地嘅產品雛型演化成一間 Startup 嘅業務計劃同 Business Model！
小編喺上個月嘅 RISE Conference 度得知有好多 Investors 都睇好香港搞 FinTech，喺佢地眼中香港係國際金融中心，提供好多金融服務，理論上有晒足夠條件發展金融科技，數碼港呢個計劃就正好可以培育出有潛質嘅 Startup，有機會嘅等小編同啲同學仔傾下，睇下佢地去完返嚟有咩得著先！
分享到 :
最新影片
